ــ شوفتي اروي فرحانة اوي مع يمني و يارا و ماما قالت اخلعوا انتم و متتعشوش عشان حاعمل بيتزا
وقفت ريم ثم نظرت لنسرين ببالغ الاستغراب و عندها استغربت نسرين و سألت :
ــ ايه يا بنتي مالك بتبصيلي كده ليه
ــ اصلك قولتي ماما فاستغربت انك مقولتيش طنط سعاد
صدمت نسرين من رد ريم فهي نفسها لم تتوقع ان تخرج منها الكلمة بتلقائية ، شعرت ريم بتوترها فلم تزد و عاودت السؤال:
ــ مش حتقوليلي رايك بقي
ــ اهه اه ، هو الاصل الموضوع في رايي اكبر من سؤال مين فينا اللي غلط ، تعرفي يا ريم انا ساعات باحس ان دي هي كل مشكلتنا ، مين فينا اللي غلطان و مين فينا اللي يتحمل اللي حصل ، بقي بيهمنا ده اكتر ما بيهمنا نقعد نناقش المشاكل نفسها
ــ طب مش يمكن الواحد لما يسأل ساعتها يعرف الغلط فين و يحله ــ او يحمل الطرف الاخر المشكلة و يقول انا مغليطش و بالتالي مفيش في ايدي حاجة اعملها ، بصي يا ريم سيبك دلوقتي من مين فيكم غلط و خالينا نسأل
اسئلة تانية و نجاوب عليها بوضوح و الصراحة
ــ طب اسألي
ــ انتي شايفة دلوقتي نظرة علاء ليكي ازاي
ــ معرفش
ــ تتوقعي ايه
ــ حاجات كتير
ــ زي
ــ نكدية و مهملة و طب ليه الفضايح دي طيب
ــ طب بلاش ، انتي شايفة علاء ازاي
ــ اناني ، مش بتاع مسؤلية ، عايز يعيش اليوم بيومه و خلاص و دايما يدور علي نفسه في كل حاجة و من يوم اروي ما جت و هو محسسني انه مكنش عايزها ، دايما يتعصب من عياطها و ساعات يعمل نفسه بيهزر و يقولي
البنت دي طالعلك علي فكرة
ــ امممممممممم و انتي بتعملي ايه ساعتها
ــ حاعمل ايه يا نسرين بصي اوعي تفتكري ان موضوع كلام البنات هو اللي عمل المشكلة احنا في مشاكل بقالنا كتير جدا