كريم لعلاء : امسك شيل بنتك ويلا بقي عشان نلحق الصلاة
علاء وهو ينزل : شيل مين يا عم اللي قالها اخدك صلاة الجمعة يشالها
ليحملها علي علي ظهره : سيبك منهم خالص يا رورو ، انتي حبيبة عمو علي صح ، يلا بينا
اروي وهو تنزل مع علي : عمو علي ثالني
لتضحك علا علي تصرفاتهم وصوتهم و تدافعهم ،لتبدأ الحركة في بيت السويفي كعادة كل جمعة لينزل يوسف ويحيي وطارق باتجاه المسجد ، سلمي ويمني و يارا و نور الي منزل جدتهم ، ثم مصطفي تتباعه عبير واخيرا عمرو
…..
ليطرق عمرو الباب المفتوح وينظر الي امه : مش عايزة حاجة يا ام عمرو
مديحة : تعيش يا حبيبي ، كله تمام ربنا يخليك لينا يا عمرو
نظرا الي شقة وكانه يبحث عن احد : امال فين علا
مديحة : في اوضتها
ليلتفت عمرو لمن خرجت من الحمام متوضأة : ازيك يا مرات عمي
سعاد : اهلا ازيك يا عمرو ، ازي شيرين والعيال
عمرو : كويسين والحمد لله
اتجه ليدخل غرفة علا ، واتجهت سعاد لتفرش سجادة الصلاة وهي تسأل : شيرين بردوا مش حتنزل الا في الاخر زي كل جمعة
مديحة : يوووووووو عليكي يا سعاد ، انتي اللي تعديه تزيده
سعاد بضيق : والله صعبان ان بعد السنين دي كلها ولسه شايفني مرات ابوها وكأنه كان ذنبي ، نفسي تعتبرني زي امها الله يرحمها
مديحة : ربنا يديكي الصحة يا سعاد ومعلش شيرين طيبة بس هو الموضوع ده معقدها شوية ، معلش يا سعاد انتي كبري دماغك ومتزعليش منها
……
عمرو وهو ينظر في ساعته : ها يا علا قولتي ايه ،شكلي حاصلي الجمعة بكرة
علا بخجل : اللي تشوفه صح يا ابيه اعملوا
عمرو وهو ليفها بذراعه : فاكرة يا لولو لما كنتي صغيرة وبتقولي لماما انا عايزة عمرو هو اللي بابا بدل بابا
لتبتسم علا وترد : فاكرة يا ابيه
عمرو مبتسما : انا بقي عايزك تعرفي انك فعلا بنتي قبل ما تكوني اختي الصغيرة ، اي حاجة محتاجها او اي حاجة ناقصكي بس شوري يا علا وانا كل اللي عايزه اني اطمن عليكي ، خلاص اكلم مع كريم واحدد كل حاجة
علا وهي لا تزال علي خجلها : ماشي يا ابيه
……
وقفت امامها وقد بدأت تدمع ثم اتجهت مسرعة الي المطبخ وحضرت عصير ليمون ثم عادت لتجلس امامها
ميار وهي تعطيها العصير : ريم اشربي بس العصير ده وحاولي تهدي
ريم بانهيار من شدة البكاء : لا يا ميار مش عايزة
ميار بتصميم : عشان خاطري اهدي وحاولي نفكر بالراحة ، مش جايز واحدة بيكلمها علي الفيس زفت ده وخلاص ومفيش بينهم حاجة
ريم وهي لاتزال علي انهيارها : لا يا ميار دي مش مجرد واحدة ، قلبي حاسس انها مراته ، الكلام اللي قرأته بيقول كده مش ممكن تكون مجرد واحدة عارفها ويكون الكلام بينهم بالشكل ده ، انا مبقتش قادرة افكر ما هو يا اما بيخوني يا اما متجوزة عليا
ميار باضطراب : علاء يعمل كده ، معقولة طب ليه يعمل كده ، ده مفيش مبرر واحد يخليه يعمل كده
قالت ميار جملتها الاخيرة وقد شعرت بالقلق ليبدأ الوسواس في نفسها وتتجمع كل تصرفات علي امام عينها وكأنها تشعر انها ايضا قد تستيقظ من غفلتها علي ما هو اصعب
لتقطعها ريم من شرودها بحزن : تفتكري اوجهه ولا اسكت ، احكي لحد ولا اعمل ايه
لتضع وجهها في كفيها لتعود لتبكي اكثر فاكثر ، اقتربت منها ميار في محاولة منها لتهدأتها ولكن بلا جدوي
لتعود ريم وتسأل : طب اقول لابيه عمرو
ميار : بلاش ابيه عمرو ، كده الموضوع حيكبر خصوصا ان ابيه عمرو مبيحبش يشوف حد في اخواته بيغلط
ريم : هو مش كان دايما يقولنا لو اخواتي زعلوكم تعالوا قولولي وانا حاجيبلكم حقكم ، خلاص اقوله وهو يجبيلي حقي
ميار وهي تحاول تهدئتها مرة اخري : بصي يا ريم احنا نصبر شوية ، وبلاش مواجهة خالص دلوقتي عدي انهاردة علي خير كده وبعدين نفكر بشوية عقل ونشوف حنعمل ايه ، ممكن
ريم وقد بدأت تشرب الليمون في محاولة منها ان تهدأ : ماشي
…..
قررت ان تشغل نفسها بما في يدها ، ولكنها باتت اكثر توترا وهي تنظر من آن لاخر باتجه الهاتف الذي بات امامه لحظات ليأتيها اتصال كل جمعة
من كثرة توترها جرحت يدها بسكين المطبخ ، ليعلو رنين الهاتف فتتجه مسرعة وهي تقف امامه ليخفق قلبها بشدة من كثرة التوتر وتترك الهاتف حتي ينهي اتصاله ، ولحظة عاد الرنين مرة اخري حاولت التماسك وهي تسحب الهاتف
شيرين بتوتر : الو
ليأتيها الصوت الرخيم المعتاد : ازيك يا مدام شيرين
شيرين بانزعاج : انت تاني ، انت ايه يا اخي مبتزهش
ليرد ساخرا : لا مبزهش ، ومش حازهق ، مش عايزة تعرفي اللي حصل امبارح بين عمرو وزيزي قصدي الدكتور خالد
لتعلو ضحكاته : تحبي ابعتلك كام صورة يمكن تصدقي ساعتها ان عمرو خاين بجد
شيرين وقد بدأت تدمع : بطل سافلة وكفاية لحد كده ، بجد انا حاقول لعمرو واللي يحصل يحصل
لتتعالي ضحكاته اكثر : طب وماله ما تقولي لعمرو ، اقولك علي حاجة كمان استني لما ابعلتك شوية صور عشان عمرو يصدق ساعتها انك عارفة وتكون المواجهة بالادلة ، ولا تحبي فيديو عشان عمرو يشوف نفسه لايف
شيرين وهي تقف من مكانها : انت مين و عايز ايه بالظبط
ليأتيها الرد بهدوء : اعتقد دلوقتي ممكن نتفاهم ، عموما حتعرفي انا عايز ايه بالظبط بس مش دلوقتي