وخرجت طنط من عندي سلمت على ماما وانا خرجت سلمت عليهم ووصلتهم لحد الباب ومشيو
واتصلت ب سلمى حكيتلها اللي حصل ووانا بكلمها لقيت رقم غريب بيرن قفلت معاها ورديت على الرقم
_الو . .
_بقا انتي مخليه أمي تتحايل عليكي يا روز؟ هدفعك تمن اللي عملتي ده بس اصبري
_انت بتهددني ولا اي انت فاكر نفسك مين هو الجواز ب العافيه انا مش عايزك ومش شايفك اصلآ
_مبقاش غيرك انتي يالي هتموتي عليا وتقولي كدا انتي كنتي تطولي اصلآ اني اسلم عليكي لكل فعل رد فعل يا روز
_يامي يامي خاف يا عيد روح اعمل الشويتين دول على متهم عندك يا حبيبي واي هموت عليك دي تكون روشدي اباظه وانا معرفش وبلاش انا تتحداني يا يوسف عشان انا دماغي تعبانه
قولتها وقفلت في وشه وانا فرحانه من نفسي جبت الجرأه دي منين؟
اكيد عشان بكلمو في التيلفون لاكن انا لو قدامه هبقا عامله زاي الكتكوت المبلول ومنكرش أني خايفه اشوفو هيعمل فيا
ومنكرش برضو اني فرحت انه كلمني لاء وكمان جاب رقمي فتحت الواتساب كتبت تاريخ اليوم اللي جيه اتقدملي فيه في البايو وحطيت قلب احمر ودبله وحطيت صورتو خلفية الشات
هو اه انا مبينه اني مش عايزاه بس انا هموت عليه حبيب قلبي
عدا يومين وطنط كانت بتنفذ خططها كل يوم تمثل انها تعبانه وتطلب منو انه يعمل اي حاجه عشان يتجوزني بس كان الغضب مسيطر عليه تقريبآ كرهني وكانت كلمته الوحيده اني لو اخر بنت في الدنيا مش هتجوزني
في اليوم التالت طنط زودتها شويه وخليتهم ينقلوها المستشفى خوفتهم عليها وطلبت انها تشوفي
لبست نفس الدريس اللي ضايقو اللي فاتت روحت المستشفى وانا بجري عليهم وعامله نفسي خايفه
_هي فين يا سلمى هي فين
سلمى دخلتني ليها وفضلنا واقفين شويه وهو كان بره واول ما دخل طنط قالت:
_اهون عليكي اموت وانا نفسي في حاجه؟ وافقي يا روز ووافق يا يوسف ريحو قلبي
انا كنت عارفه انها بتمثل بس الأداء كان عالي اوي ل درجة اني صدقت وعيط وقولت:
_خلاص يا خالتي موافقه بس قومي الله يخليكي اوعي تسبينا مش عايزه تفرحي بينا قومي بقا عشان تختاري معايا فستاني وتشيلي عيالنا اوعي تسبينا بالله عليكي
تقريبآ هو اتأثر فضلنا واقفين شويه لحد ما الدكتور جيه طمنا وبعد شويه كنا خرجنا من المستشفى طنط ركبت العربيه هي وسلمى وكان هو لسه واقف وانا برضو كنت واقف طنط قالت:
_يلا يا روز اركبي
_لاء يا خالتي انا هروح على البيت عشان ماما متعرفش وزمانها قلقانه
وبصيت ليه بتحدي وقولت:
_استعد انت ل جحيمك يا حضرت الظابط
عض على شفايفو وقال:
_ده انا هقطعك
لفيت ومشيت على طول خوفت منو وقرارت اني مش هعصبه تاني انا مش قده
روحت البيت وحكيت ل ماما اللي حصل
وعدا يوم وجم انهارده عشان يتفقو ونلبس الدهب
بعد كلام كتير وانفقات اكتر قطع كلامهم صوتو هو بيقول:
_فترة الخطوبه دي انا مش بعترف بيها فا هو شهر ونكتب الكتاب انا جاهز وهي جاهزه نستنى ليه ؟
ردت ماما وقالت:
_ماشي يا ابني عدك العيب
ردت طنط وقالت:
_نقرأء الفاتحه بقا
قرينا الفاتحه ولبسني الدبله مسك آيدي جامد لدرجة انها كانت هتتكسر في إيده عكسي تمامآ مسكت إيده براحه ولبستو الدبله بهدوء وبدأت الاغاني والزغاريط تملى الشقه
خلص اليوم وقبل ما يمشي قال:
_استعدي انتي بقا ل جهنم الحمرا
قالها ومشي مش مهم جهنم جهنم المهم اني هتجوزه ونال قلبي مراده بعد طول الانتظار
فترة الخطوبه كانت فتره عبيطه ولا بنخرج ولا بنروح ونيجي ولا بيسأل رايحه فين وجايه منين ولا اي حاجه كأني مش موجوده في حياته
كان فاضل اسبوع على كتب الكتاب قطع اندماجي في دبلته اللي في إيدي صوت خبط الباب فتحت وكان هو
كنت لابسه بيجامه نص كمٌ
_ايوا في حاجه؟
_انتي ازاي تفتحي الباب وانتي كدا؟
_عادي فكرتك ماما
_ومطلعتش ماما يبقا تدخلي تلبسي حاجه محترمه واي نيله على شعرك وتخرجي
_طيب
قولتها ورزعت الباب في وشه ودخلت لبست الاسدال وخرجت
_ها اوامرك ياباشا
_عايز صورة شهادة ميلادك وبطاقتك
_ليه هتعمل عني تحريت قبل ما تتجوزني؟
_لاء عشان المأذون يا ام لسانين وحيات امي بعد الجواز ل اقطعلك لسانك ده
_هنشوف يا يوسف الشاطر اللي يضحك في الاخر
قولتها ودخلت وانا فرحانه اني خلاص هبقا مراته جبت الورق اللي عايزو وخرجت اديهلو
خده وكان خلاص هيمشي بس مكنتش عايزاه يمشي قولت:
_استنى
_اي؟
_شوف كدا الورق مظبوط
بص فيه وقال:
_مظبوط اه
وكان هيمشي وقفته وقولت:
_استنى
_اي تاني؟
_هي خالتي عامله اي؟
_كويسه
قالها وكان هيمشي وقفته وقولت:
_استنى
_اممم
_اتأكد إن الورق مظبوط مش ناقص لا ترجع تاني
بص في الورق وقال بنرفزه:
_مظبوط ياستي
لف وكان هيمشي وقفته تاني قولت:
_استنى
لف وهو بيضحك وقال:
_انتي عايزه اي؟
_مش .. مش عايزه حاجه
_امال مش عايزني امشي ليه؟
_أبدآ امشي هو انا ماسكك؟
_طيب ادخلي يلا وقبل ما تفتحي الباب ابقي اسألي مين الاول وتلبسي حاجه ياختي
_حاضر يا قلب اختك
قولتها وضحكت وهو ضحك وسابني ومشي
اول مره يضحك وانا بكلمو اول مره اشوف ضحكته وكان4
عدا الاسبوع وانهارده كان كتب الكتاب كنا مقرارين إننا مش هنعمل فرح مزعلتش ان مش هيتعملي فرح كبير زاي ما كنت بحلم ولا حتى هلبس فستان عروسه كل ده يهون لأجل اني هتجوز اكتر انسان حبيته في الدنيا
كنت لابسه دريس ابيض كله دانتيل لفة طرحه سيمبل ميكب خفيف سلمى كانت معايا هي ومامتها ودقايق وكان هو جيه ومعاه المأذون
والقليل من الدقايق والمأذون قال كلمته الشهيره:
_بارك الله لكم وبارك عليكم وجمع بينكم في خير
رقعت زغروطه من فرحتي جابت اخر الشارع وقومت حضنتهم كلهم باركو لينا معاده هو مقاليش الف مبروك حتى .. كان مع أصحابو مالوش دعوه ب اي حاجه
وبعد وقت مش كتير جيه ناحيتي وقالي:
_مش يلا ولا هنفضل طول اليوم نغني ونرقص؟
جت ماما وصته عليا وسلمو علينا وخدني ونزلنا ركبنا العربيه وطول الطريق صمت محدش اتكلم في حاجه لحد ما وصلنا البيت
فتح الباب ودخل وقال:
_حضريلي الغدا
_نعم ياخويا!!
_اي بقولك حضريلي الغدا
_انت تعبان في دماغك ولا اي المفروض اني عروسه من بعد كام ساعه من فرحي هقف اطبخ؟
_اه وفيها اي؟
_بقولك اي انا مش فايقلك اسلق بيضتين وابعد عني
قولتها ودخلت اوضتي قفلت الباب وغيرت هدومي بعد حيره كبيره مش عارفه البس اي لبست ترينج محترم وفتحت الباب ونمت
مفيش عشر دقايق ولقيته جاي يصحيني ويقول:
_قومي هاتي شوية مياه سخنه وادعكي رجلي
_يانهارك اسود انت هتعيشلي دور سي سيد ولا اي؟
_اه هعيش دور سي سيد يا روز وتقولي حاضر وانتي ساكته
_لاء مش هقول حاضر ولو انت هتكون سي سيد انا مش هكونلك امينه يا يوسف لاء انسى
_ماشي بكرا نشوف