رابح: بلاها الكلام الماسخ ده يا حاجه ما تنسيش تخلي رحمه تتكلم مع فرح في حكايه جوازنا مره ثانيه وتفهمها ان صبري عليها بدا ينفذ ومش هصبر تاني كتير بالاذن بجى. ( خرج رابح من بيت الحاجه نصره وهو بيتوعد لفرح لو ما خضعتش ووافقت على الجواز منه وبعد ما خرج بشويه دخلت رحمه لقت امها بتكلم نفسها. نصره: الله يجطعك يا ولد المحروج انت ما كانش ناجص غيرك كمان تتحكم فينا جال ايه فرح تتجوزك ده بعدك والله ده انا اجتلك فيها هو ما حدش هيجدر لك ولا ايه.
رحمه: مالك ياما انت بتتكلمي مع روحك ولا ايه يا حبيبتي في حد زعلك ناصره: لا يا بتي ده رابح جنني لجيته جاي بيجولي هي رحمه مش هتزور فرح الشهر ده ولا ايه احسن يكون حاصل حاجه وحشه بينهم رحمه: غريبه يعني من نفسه اكده خير ايه اللي جرى في الدنيا عشان يسال نصره: اصله عايزك تتكلمي مع فرح عن موضوع الجواز تاني عرفتى ليه يا اختي عاوزك تروحي عشان مصلحته مش علشان حاجه ثانيه
رحمه: اه علشان اكده انا اصلا ما بتكلمش معاها في حاجه واصل… انا هكلمها واتفج معاها اروح لها امتى طالما هو جالك ان انا اروح وسيبك منه هو يجول اللي هو عاوزه ناصره: مش خايفه يا بنتي لا يعرف انك ما بتكلميهاش في حاجه ويعمل لنا مشاكل ده ممكن يخليكى ما تروحيش الجامعه ثاني بسبب الموضوع ده رحمه: سيبيها على الله ياما انا ما بخافش غير من اللي خالجني وبس وهو مش هيعلجلي المشنجه ( وفي نفس الوقت في فيلا صفوت الشافعي كانت فرح شرحتله كل حاجه عن حاله جاسر وكان جاسر وفادي في الوقت ده وصلوا بره قدام الفيلا
صفوت بحزن: يعني حتى التدخل الجراحي ما بقاش ينفع ولازم عمليه زرع ده كان مستخبيلي ده كله فين بس يا ربي حتى لو جينا نعملها هنجيب منين حد يتبرع بقلب.. اصل دي مش كليه ولا دم ده قلب والموضوع مش سهل حتى واهيبين الاعضاء الموضوع هيبقى صعب من عندهم كمان. فرح: حضرتك بس قعدني معاه الاول اقنعه بالعمليه وبعدين انا بنفسي هدور على متبرع هنا وفي الخارج كمان بس بلاش تاخير من فضلك كل دقيقه بتعدي على جاسر فيها خطر على حياته والموضوع مش سهل زي ما انتم فاكرين.
( وهم بيتكلموا دخل فادي وجاسر ساند على كتفه ووشه اصفر واول ما شاف فرح قدامه ركبه شيطان الغضب ونفض ايد فادي من عليه وراح وقف قدامها بغضب. جاسر: انتى… انتي جايه هنا ليه وبتعملي ايه في بيتي.. بتعمل ايه هنا دي يا بابا صفوت: اهدى يا جاسر وبطل العصبيه دي يا ابني الدكتوره فرح كانت جايه ليا انا مش جايه ليك جاسر: اطلعي بره انا مفيش ستات بتدخل هنا عندي ابدا مش كفايه عمايلك في المستشفى مره ما ترضيش تديني مسكن والمره الثانيه بتقلى ادبك وعاوزاني اعتذر لك وكمان جايالي هنا بنفسك
فرح: يا استاذ جاسر انا كنت جايه في موضوع مهم لصفوت بيه ما فيش داعي للعصبيه والانفعال ده كله يعني. فادي: انا متاسف جدا على المقابله دي يا انسه فرح هو اصله تعبان جدا معلش اعذريه. جاسر: ما حدش يتكلم بالنيابه عني انتم فاهمين ثم اني مش تعبان ولا حاجه انا عمري ما تعبت ولا هتعب ولا هحتاج لحد وانتى ثانيه ومش عايزه المح خيالك هنا انتى فاهمه انا بقول ايه انا ما بدخلش ستات بيتي وبكره الستات.
فرح: انا ما اذيتكش علشان تكرهني وعلى فكره انت تعبان وتعبان جدا كمان ودي حقيقه صدقتها او كذبتها هو ده الواقع. ( كان جاسر لسه هيرد على اللي قالته الا انه حس بدوخه ورجليه ما شالتوش وقع على الارض اغمى عليه ووشه اصفر. فرح: بسرعه طلعوه اوضته وانا طالعه معاكوا اعمله اللازم ربنا يستر اهى دي المضاعفات اللي كلمت حضرتك عليها يا صفوت بيه صفوت: ربنا يستر يا بنتي. فادي: مضاعفات ايه انا مش فاهم حاجه.
(وفعلا كلهم شالوه وطلعوه فوق نيموه في سريره وغطوه وهو فاقد الوعي وقعدت فرح جنبه تكشف عليه. صفوت: ايه اللي حصل يا بنتي فهميني جاسر عمره ما كان ضعيف بالمنظر ده… ده وقع فجاه وسطينا
فرح: ده بقى اللي كنت بكلم حضرتك عنه حاله ضعف عام بسبب اهماله تقريبا هو كان معود نفسه كل ما يحس ببدايه تعب ياخد مسكن لحد ما جسمه اتعود عليه بس الظاهر بقى انه نسي ياخد النهارده المسكن ده.. وده السبب في انهياره بالشكل الفظيع ده لان كل التعب اللي هو كان بياجل ظهوره والاعراض اللي كان بيخفيها المسكن هجمته فجاه اول ما نسي ياخد المسكنات علشان كده بقول لحضرتك لازم نتحرك وبسرعه ما فيش وقت.
فادي: بس بس وقفي كلامك ده شويه انا مش فاهم حاجه انتى بتتكلموا عن مين عن جاسر اكيد لا مستحيل طبعا جاسر عنده شويه برد اكيد وبس ده احنا كلنا مسنودين عليه انتى قصدك ايه بكلامك ده صفوت: اهدي يا فادي الدكتوره فرح بتقول الحقيقه اخوك تعبان قوي ولازم نعمله عمليه زرع قلب في اسرع وقت وانا تايه ومش عارف اعمل ايه لازم تقف جنبي مش وقته تنهار خالص يا ابني
فادي: مستحيل يا بابا مستحيل اقع وانهار واخويا محتاجلي انا عندي حل انتى خدي قلبي اديهوله واديني قلبه اعيش قد ما اعيش بيه حتى لو هبقى تعبان بس هو يبقى بخير على الاقل هو هيعرف يتصرف ويراعيني انما انا ما بعرفش اعمل اي حاجه من غيره انا من غير جاسر ناقص وفاشل وصفر على الشمال. فرح: اهدوا بس شويه يا جماعه الموضوع مش بالبساطه دي اكيد في حل ثاني.
( وهم بيتكلموا لاحظوا ان جاسر بدا يفوق بعد ما فرح اديته حاجه علشان تفوقه واول ما فتح عينيه وشافها قاعده جنبه ما قدرش يتمالك نفسه من الغضب وراح زقها بقوه على الارض شعرها اتفك واتخبطت في شفايفها اتعورت. صفوت: انت اتجننت ايه اللي انت عملته ده مين اللي ادالك الحق انك تمد ايدك عليها هي عملت ايه علشان تمد ايدك عليها بالمنظر ده فادي: ما يصحش اللي انت عملته ده يا جاسر دي في بيتك انت واعى للي انت بتعمله انت بتغلط وده مش طبعك مهما كانت حالتك عمرك ما عملت حاجه زي دي.
( كانت فرح بتسمعهم وهم بيتكلموا وهو لسه بيبصلها وهي بتبصله بصمت. فرح: بعد اذنك يا صفوت بيه تاخد استاذ فادي وتطلعوا بره انا محتاجه اتكلم مع استاذ جاسر ربع ساعه واكيد حضرتك عندك ثقه فيا صح ولا لا. صفوت: اكيد طبعا يا بنتي انا اسف جدا يا فرح على اللي حصل دلوقتي انا مش عارف اقولك ايه والله يا بنتي يلا بينا يا فادي نسيبهم شويه. ( خرج صفوت ومعاه فادي وسابوا فرح وجاسر وهم لسه واقفين قصاد بعض وعينيهم ما نزلتش عن بعض.
فرح: اسمحلي الاول اعيد ترتيب شعري اللي اتبهدل ده وبعدين نتكلم علشان افهمك كل حاجه. ( وقفت فرح تدور بعنيها على مشبك شعرها اللي وقع منها لما جاسر زقها على الارض لحد ما شافته جت توطي تجيبه وطي معاها في نفس اللحظه دماغهم اتخبطت في بعض. فرح: اااه متشكره يا سيدي على المجهود ده ممكن بقى تديني المشبك بتاعي الم شعري علشان نتكلم. (كان جاسر متنح قدامها ومستمتع بشكلها وشعرها نازل على وشها. جاسر: ما فيش مشابك ومش هديكي حاجه الا ما اعرف انت خرجتيهم بره ليه هو في ايه بيننا علشان نتكلم فيه اصلا
فرح: هو انت بتكرهني ليه انت تعرفني قبل كده انا اعرفك مثلا يعني. جاسر: ولا اعرفك ولا عايز اعرفك يا ستي وانا مش بكرهك لوحدك انا بكره كل الستات بالاجماع وما لكيش انك تساليني عن السبب فرح: بس انا ما سالتش على فكره ايه السبب. جاسر: ما انا بقول لك قبل ما تفكري تسالي اصلا بقصر عليكى الطريق يعني. فرح: لا ما انا ما كنتش هسال اصلا وبعدين انا من الناس اللي بتحب الطرق الطويله جدا
جاسر: هو انتى عاوزه تموتيني ما تمشي بقى انتى طلعتيلي منين
فرح: بعيد الشر عنك وبطل عصبيه علشان ما تتعبش اكتر من كده شوف انا مش من نوع الدكاتره اللي بتخبي على المريض تعبه ولا بتزوق الحقيقه انا بحب اجي دوغري حضرتك لما كنت جاي بحالة تسمم المستشفى انا شفتك بالصدفه ويومها لما شفت طريقه تنفسك وانت نايم شكيت في حاجه واستاذنت والدك اعمل لك شويه فحوصات وحصل وطلع شكى في محله انت عندك قصور كلي في عضله القلب وتلف في الصمام الرئيسي بمعنى اخر انت لازم تعمل عمليه زرع قلب في اسرع وقت والا حياتك هتبقى في خطر وقبل بقى ما ترفض وتقول لي انا ما بتعبش وانا قوي واشجع راجل
في العالم او حتى تقول مش مهم خليني اموت احب اقول لك ان والدك كان هيجراله حاجه لما عرف واخوك عرض عليا اني اخد قلبه اديهولك ويعيش هو بقلبك حتى لو ايام قليله بس انت تعيش علشان كده قبل ما تقول لا فكر انت مهم عند ناس قد ايه بيحبوك ومسنودين عليك انا كده خلصت كلامي معاك ممكن بقى بعد اذنك تديني مشبكي علشان الم شعري وامشي ولو حصل وحضرتك وافقت انا هديك اهو الكارت بتاعي تقدر تبلغني في اي وقت لو وافقت هات بقى المشبك من فضلك.
(بعد ما سمع جاسر كل كلامها اللي ما قدرش حتى يجاوب على حرف منه اداها المشبك الخاص بيها واول ما جت تخرج ندهلها جاسر: استني عندك يا انسه انتى بعيدا عن انك صدمتيني بفكره اني ممكن ابقى احم زي ما انتى بتقولي عيان وكده يعني بس هو انتى خرجتيهم عشان تقوليلي الكلام ده بس اللي اصلا كان ممكن تقوليه قدامهم نظرا لانهم عارفين فرح: وهو في ايه بينا تاني غير الموضوع ده… انت تخيلت ان انا ممكن اتكلم معاك في ايه ثاني غير كده يعني.
جاسر: انا تخيلت انك ممكن تكوني خرجتيهم عشان تحاسبيني يعني على… فرح: ما حصلش حاجه والموقف اللي حصل ده انا هعتبره ما حصلش بعد اذنك انا ورايا شغل كثير جدا فكر في كلامنا وكلمني عرفني هتتصرف ازاي بعد اذنك وما تقلقش انا مسامحه في حقي يعني مش هدعي عليك بيه. (ما استنتش فرح ان جاسر يرد على كلامها وخرجت على طول علشان تخفي زعلها من الموقف اللي حصل معاها وقعد هو غضبان بيفكر ولما نزلت وقفها صفوت وفادي بسرعه علشان يعتذروا لها عن الموقف اللي حصل.
فادي: انا بجد اسف جدا بالنيابه عن جاسر على اللي عمله معاكي وعلى فكره ده مش طبعه ابدا والله جاسر مستحيل يمد ايده على بنت لكن انا مش عارف ايه اللي حصل صفوت: يا خبر يا بنتي ده انت اتعورتي.. جاسر زودها قوي تعالي اقعدي انظفلك الجرح ده قبل ما تمشي واقبلي مني اعتذاري فرح: انا مش عارفه انتم مكبرين الموضوع كده ليه جاسر انا هعرف اتصرف معاه انما انا ما بحبش اشوف حد متوتر كده بسببي ما تقلقوش انا بخير بعد اذنكم بقى.
الفصل ال4 (بعد ما مشيت فرح من بيت جاسر عدى عليها باقي اليوم بهدوء وفي الوقت ده كان جاسر بيفكر في كلامها لدرجه انه رفض حتى يتكلم مع ابوه او اخوه ولا يعترف بمرضه. جاسر: انا مش عيان ولا حاجه هم بس اللي مكبرين الموضوع انا كويس.. حبايتين مسكن وهبقى حلو جدا مش هسيب كل حاجه تقع على دماغهم هم ولو انا حتى عيان بجد مش هسمح انهم يقعوا بسبب ضعفي ان شاء الله هبقى كويس.
( وتحت كان صفوت وفادي قلقانين وما بطلوش تفكير واعصابهم اتحطمت من القلق وهو رايح جاي قدامهم ما بيتكلمش مع حد فيهم. فادي: وبعدين يا بابا احنا هنسيبه اخذ الموضوع كده عادي بمزاجه مش هنحاول ان احنا نعمل اي حاجه خالص المفروض نتصرف ونجبره يعمل العمليه دي صفوت: يا ابني ما فيش حاجه اسمها نجبروا انه يعمل العمليه لو ما كانش مقتنع يبقى ما لهاش لازمه جاسر مش صغير وانت عارف ان ما فيش حد بيعرف يمشي كلامه عليه.
فادي: يعني هنسيبه يموت نفسه بالبطيء ده حتى يبقى ظلم. صفوت: ان شاء الله خير اللي عاوزه ربنا هيكون. ( فرح كل ده كانت حزينه وزعلانه وبتقعد في مكتبها في المستشفى تعيط بسبب الموقف اللي حصل بينها وبين جاسر. فرح: مش عارفه انا عملت له ايه علشان يعمل معايا كده كل ده علشان بواجهه بتعبه ومرضه امال لو ما كانش كل حاجه بالورق وعليها دليل كان عمل ايه بس انا مش هيأس هدور برده على حد يكون عامل وهب اعضاء وهدخل كذا قائمه انتظار هنا وبره علشان اشوفله القلب وان شاء الله انا عندي ايمان ان هو قريب هيوافق
( كانت كل الفتره دي بتعدي على فرح وهي بتدور على القلب المناسب لجاسر ورحمه ما كانتش نزلت على طول علشان كان عندها امتحان واليوم ده بعد ما رجعت فرح من بره تعبانه نامت وما صحتش غير على صوت نوال امها وهي بتصحيها. نوال: فروحه اصحي بقى يا قلبي تاخرتي على شغلك وكمان في حد مستنيك بره بقاله ربع ساعه واكثر قومي بقى. فرح: يا ماما انا ما بنامش بقالي اسبوع سيبيني شويه مين بس اللي مستنيني دلوقتي في ساعه زي دي ده ايه الرخامه دي على الصبح.
رحمه فجاه: انا يا واكله ناسك اجعد ولا ارجع من مطرح ما جيت عشان تعرفى تنامي براحتك فرح: رحمتي كيفك يا غاليه اتوحشتك جوي كل دي غيبه وانا اللي عماله اجول بكره بعده هتيجي وانتى ولا على بالك نوال: يا لهوي نفسي اعرف بتقلبي صعيديه كده فجاه ازاي لما بتشوفيها وكانك متربيه في الصعيد. (بعد اللقاء الجميل ده ما بين رحمه وفرح خرجوا وقعدوا في الصاله يفطروا ويتكلموا ويضحكوا وبعد شويه استاذنت فرح عشان تلبس وتروح شغلها لما دخلت وراها رحمه.
رحمه: يعني الاسبوع الاجازه اللي انا جايه اجعدوا معاكي هتروحي فيه الشغل بردك وتسيبيني امال انا جايه اجعد مع مين فرح: طيب ما تيجي معايا يا دكتوره رحمه هو انت مش تخصص طب يبجى انزلي معايا المستشفى واعتبري حالك في تمرين اهو حتى تكتسبى خبرات رحمه: والله فكره بس انا كنت عاوزه انزل اشتري شويه حاجات الاول جبل ما اجي معاكي ايه رايك ما تاجي معايا وبعدين نروح مع بعض المستشفى. فرح: روحي اشتري الحاجه اللي انتى عاوزاها كيف ما تحبي بس ما تزعليش مني مش هعرف اجي معاكي اصل طلبوني بسرعه في الشغل وما اجدرش اتاخر معلش يا حبيبتي.
رحمه: خلاص يا حبيبتي ما تاخريش روحك سيبيلي عنوان المستشفى وانا هجيب اللي محتاجاه وابعته على اهن واجي لك على طول اتفجنا فرح: اتفجنا.. تمام جوي هستناكى هناك انا هنزل بجى وخدي عنوان المستشفى من ماما عشان متاخره جوي. (راحت فرح المستشفى بسرعه وكانت رحمه حاسه بشويه تعب في معدتها لكن هي من النوع اللي بيتجاهل الالم ده نوال: مالك يا بنتي بطنك بتوجعك ولا ايه يا رحمه رحمه: ولا وجع ولا حاجه ده شويه مغص خفيف ما تجلجيش انا هنزل بجى ومش هغيب
نوال: ماشي يا حبيبتي ما تنسيش تاكلي حاجه لحد ما تيجي مع فرح وتتغدوا رحمه: حاضر بالاذن. (نزلت رحمه واشترت كل اللي نفسها فيه وبعدين بعتته على العنوان بتاع فرح وراحت المستشفى وهي بتعدي الشارع اللي قدام المستشفى ما اخذتش بالها من العربيه اللي جايه ناحيتها بسرعه صرخت فجاه العربيه وقفت قدامها من غير ما تخبطها ونزل منها فادي بوسامته المعتاده علشان يطمن يشوف فيها حاجه ولا لا. فادي: جرى ايه يا انسه مش تاخدي بالك وانتى معديه الشارع كنت هتخليني اخبطك وتجيبيلي داهيه.
رحمه: انا بردو اللي اخذ بالي يا جدع انت ولا انت اللي تفتح وانت ماشي لما انت ما بتعرفش تسوج بتتهب تركبها ليه ايه فاكرين نفسكم راكبين طيارات ده اسفلت يعني في بني ادمين رايحين جايين. فادي: الله الله شوف مين اللي بيتكلم بقى انا ما بعرفش اسوق يا جاهله ده انتى لسانك اطول منك صحيح يعني غلطانه وبتبجحي. رحمه: انا جاهله يا كركوب يا معيوب…. يا صرصار نايم بالمجلوب… يا حمار بيتحدف بالطوب… يا بهيم انت.. ما تفوج لحالك يا اخ.
فادي: ايه ده كله… ايه ده كله.. انتى بتقولي ايه انا مش فاهم اي حاجه.. بت انتى اوعي تكوني بتشتميني ومستغله اني مش فاهم اللغه رحمه: لا والله نبيه ما انا اكيد بشتمك مش بتجول عليا جاهله بجولك ايه يا اخينا وسع من جدامي احسن انا تعبانه ومش جادره اجف على رجلي وانت عمال تتحنجل جدامي كيف فرجع لوز فادي: استني بس تعبانه من ايه هي العربيه خبطتك بجد ولا انتى تعبانه من حاجه ثانيه
رحمه: يا سيدي لا ما خبطتنيش وسع بجى من جدامي مش جادره ده ايه المصايب اللي على الصبح دي فادي: طب استني بس انا هوصلك فوق شكلك فعلا تعبانه جدا وبعدين لمى لسانك شويه انا ما غلطتش رحمه: انا اللي غلطانه يا سيدي ارتحت اكده…وبعدين انا بعرف اوصل نفسي بنفسي ريح حالك انت. (سابت رحمه فادي ودخلت المستشفى وهو وراها ركبت الاسانسير ركب في نفس الاسانسير معاها كانت بتبص له بغضب وهو مش مرتاح لملامحها التعبانه واول ما جه يبص عليها لقاها بتمسك في جدار الاسانسير علشان ما تقعش حاول يسندها.
رحمه: لا ما تلمسنيش يا جدع انت ابعد عني فادي: هو التعب في عند كمان يا انسه انا هسندك لحد ما نطلع على اوضه الكشف فوق بس على فكره انا انسان محترم جدا يعني